Olduqca vacib qələbə qazandıq. Komandamın çıxışı xoşuma gəldi. Bəlkə də çempionatın ən əzmkar komandasına qarşı oynadıq. Matçın ilk hissəsi meydanın mərkəzində keçdi. İkinci hissə isə bizim üçün daha yaxşı alındı.

Bunu "Zirə"nin baş məşqçisi Rəşad Sadıqov Azərbaycan Premyer Liqasının XVI tur matçından sonra mətbuat konfransında deyib.

Görüşün gərgin keçdiyini bildirən 40 yaşlı mütəxəssis meydanda mübarizə aparan bütün futbolçuların qəhrəman olduğunu söyləyib: "Hamısının qələbədə rolu var. Hamidu Keyta tam hazır deyil. Buna baxmayaraq xarakter göstərir, sonadək mübarizə aparır. Bu, məni sevindirməyə bilməz. O, həm hücumda, həm də yarımmüdafiənin cinahında effektivdir".