Azərbaycan Musiqi Mədəniyyəti Dövlət Muzeyində keçirilən təntənəli mərasimdə həm də “Səhnəmizin Məcnunu Baba Mahmudoğlu” kitabının təqdimatı keçirildi. Şair-publisist Əli Rza Xələfli görkəmli sənətkarımız, xanəndəlik sənətində xüsusi dəsti-xətti olan Baba Mahmudoğlunun yaradıcılığından söhbət açdı. Tədbirdə sənətkarın sənət dostları, iş yoldaşları, onu daha yaxından tanıyanlar öz xatirələrini bölüşdülər. Yazıçı Nahid Hacızadə, Çingiz Fərəcov, Xalq artisti Canəli Əkbərov Baba Mahmudoğlunun həyatının, yaradıcılığının müxtəlif məqamlarından xatirələr danışdılar,kitabın ərsəyə gəlməsində böyük əməyi olan ömür-gün yoldaşı Amaliya xanıma minnətdarlıqlarını bildirdilər. Sonra Baba Mahmudoğlu adına xalq çalğı alətləri ansamblının müşayiəti ilə müxtəlif musiqi nömrələri səsləndirildi, mahnılar ifa olundu.