Azərbaycan Prezidenti İlham Əliyevin sərəncamı ilə yaradılan İnformasiya Texnologiyaları Universiteti bu il sentyabrın 15-dən etibarən fəaliyyətə başlayacaq. Bunu çərşənbə axşamı jurnalistlərə Təhsil Nazirliyinin Aparat rəhbəri İlham Pirməmmədov deyib.

Pirməmmədov qeyd edib ki, həmin universitetin əsasnaməsi və hansı ixtisaslar üzrə kadrlar hazırlayacağına dair sənədlər Təhsil Nazirliyinə göndərilib.

"Bu yaxınlarda Təhsil Nazirliyi bununla bağlı öz rəyini bildirəcək. Tələbə Qəbulu üzrə Dövlət Komissiyası isə qəbul planına əsasən tələbələrin qəbulunu aparacaq", - Pirməmmədov bildirib.

Qeyd edək ki, Azərbaycan Prezidenti İlham Əliyev fevralın 1-də İnformasiya Texnologiyaları Universitetinin yaradılması haqqında sərəncam imzalayıb.