Milli Gimnastika Arenası bir illik fasilədən sonra beynəlxalq yarışlara yenidən ev sahibliyi etməyə hazırlaşır.

Azərbaycan Gimnastika Federasiyasına istinadla xəbər verir ki, qlobal COVID-19 pandemiyası səbəbindən təxirə salınmış və bu ilin may ayında keçirilməsi gözlənilən yarışların təşkilinə həmin tədbirlərin əhəmiyyəti nəzərə alınaraq Azərbaycan Respublikasının Nazirlər Kabinetinin müvafiq qərarı ilə icazə verilib.

Sözügedən yarışlar “Tokio-2020” Yay Olimpiya Oyunlarına təsnifat xarakteri daşıyan bədii gimnastika üzrə dünya kuboku (7-9 may), aerobika gimnastikası üzrə yaş qrupları yarışları (21-23 may) və bu növ üzrə dünya çempionatıdır (27-29 may).

Turnirlərin ölkəmizdə tətbiq edilən mövcud karantin qaydalarına və sanitar-epidemioloji tələblərə uyğun olaraq və tamaşaçı iştirakı olmadan keçirilməsi planlaşdırılır.

Xatırladaq ki, qlobal COVID-19 pandemiyasına görə ölkəmizdə görülən təxirəsalınmaz və qabaqlayıcı tədbirlərlə əlaqədar 2020-ci ildə Bakıya həvalə olunmuş 8 beynəlxalq turnirdən yalnız ikisi baş tutmuşdur. Digər yarışlar ləğv edilmiş və ya təxirə salınmışdır.