Azərbaycan Səhiyyə Nazirliyi Ağdaş Mərkəzi rayon Xəstəxanasında baş vermiş ana və uşaq ölümü hadisəsini araşdırmağa başlayıb. Bunu cümə günü Səhiyyə Nazirliyinin mətbuat xidmətinin rəhbəri Anar Qədirli deyib.
Onun sözlərinə görə, araşdırmanı Səhiyyə Nazirliyinin Doğuşayardım Komissiyası aparır.
Komissiya apardığı araşdırma zamanı ölümün konkret səbəbini müəyyən edəcək. Bundan sonra isə xəstənin ölümündə həkimin günahının olub-olmaması barədə qərar veriləcək və buna uyğun da tədbirlər görüləcək.
Qeyd edək ki, Ağdaşın Yuxarı Nəvətava kənd sakini, 35 yaşlı Məcidova Pərvanə Akif qızı və onun dünyaya gələcək qız övladı ötən gecə doğuş zamanı ölüb.